Panik total nan fanmi imigran san papye yo ki menase ak depòtasyon nan plan Donald Trump laAdministrasyon Trump la sot lanse yon gwo operasyon arestasyon ak depòtasyon imigran san papye atravè Etazini, yo rele “Operasyon Safeguard”. Inisyativ san parèy sa a mobilize plis pase 150 ajan ICE ansanm ak anplwaye FBI, ATF ak DEA nan plizyè gwo vil tankou Chicago, Miami ak Newark. Nan kèk jou sèlman, yo te arete plis pas 2000 imigran, yon sitiyayson ki kreye panik nan kominote imigran yo.

Anpil rezidan pè kite kay yo poutèt yo pè yo arete yo.Malgre Kongrè a gen tout pouvwa sou zafè imigrasyon dapre Atik I Konstitisyon an, dimansyon operasyon sa a soulve kesyon sou limit otorite federal la. Defansè dwa imigran yo di ke atak sa yo ka vyole Katriyèm Amannman an ki pwoteje kont fouy ak sezi abizif. Laperèz gaye nan kay yo, legliz yo, lopital yo ak espas travay yo, anpil fanmi kache lakay yo poutèt yo pè yo separe yo. Lekòl yo rapòte yon gwo bès nan prezans elèv ki soti nan fanmi imigran yo.

Malgre dimansyon li, pwogram nan ap fè fas ak limit lojistik ak bidjè enpòtan. Dapre estimasyon yo, yon operasyon pou depòte 11 milyon imigran san papye yo ta koute plizyè santèn milya dola. Sant detansyon yo deja twò plen epi sistèm jistis imigrasyon an chaje, sa ki ralanti anpil pwosesis depòtasyon an. Anplis, anpil jiridiksyon lokal refize kolabore ak ICE, sa ki konplike plis egzekisyon pwogram nan.

Operasyon masif sa a ka gen konsekans ekonomik enpòtan. Imigran yo, menm san papye, jwe yon wòl enpòtan nan anpil sektè ekonomi ameriken an, espesyalman agrikilti ak konstriksyon. Depa an mas yo ka lakòz mank mendèv ak ogmantasyon pri pou konsomatè yo. Apeprè 42% travayè agrikòl Ozetazini yo san papye, epi depòtasyon yo ta ka deranje grav endistri agrikòl ameriken an.